Author: Mustak Daula

સરકારની વિવિધ યોજનાઓના લાભ એક જ સ્થળે મળ્યા…

ગુજરાત સરકારના પ્રજાભિમુખ અભિગમના ભાગરૂપે ટંકારીઆ ખાતે ‘સેવા સેતુ’ કાર્યક્રમનું સફળ આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય સ્થાનિક નાગરિકોને વહીવટી પ્રક્રિયાઓ માટે સરકારી કચેરીઓના ધક્કા ખાવા ન પડે અને તેમના પ્રશ્નોનો સ્થળ પર જ નિકાલ થાય તેવો હતો. ગ્રામજનોએ આ તકનો બહોળો લાભ લીધો હતો અને એક જ છત્ર નીચે અનેક સરકારી યોજનાઓના લાભો મેળવ્યા હતા.
એક જ સ્થળે વિવિધ સેવાઓ ઉપલબ્ધ કરાઈ
આ સેવા સેતુ કેમ્પમાં વહીવટી તંત્રના વિવિધ વિભાગોના અધિકારીઓ અને કર્મચારીઓ હાજર રહ્યા હતા. કાર્યક્રમ દરમિયાન નીચે મુજબની મુખ્ય સેવાઓ અને યોજનાઓના લાભો સ્થળ પર જ ફાળવવામાં આવ્યા હતા:
• આધાર કાર્ડ સંબંધિત કામગીરી: નવા આધાર કાર્ડ બનાવવા તેમજ સુધારા-વધારા કરવાની કામગીરી કરવામાં આવી હતી.
• આવક અને જ્ઞાતિના પ્રમાણપત્રો: વિદ્યાર્થીઓ અને નાગરિકો માટે જરૂરી વિવિધ દાખલાઓ સ્થળ પર જ ઈસ્યુ કરાયા હતા.
• રેશનકાર્ડને લગતી સેવાઓ: નવા રેશનકાર્ડ, નામ ઉમેરવું કે કમી કરવું જેવી પ્રક્રિયાઓ હાથ ધરાઈ હતી.
• આયુષ્માન ભારત (PM-JAY) કાર્ડ: આરોગ્ય વિમાનો લાભ આપતા આયુષ્માન કાર્ડ સ્થળ પર જ કાઢી આપવામાં આવ્યા હતા.
• વૃદ્ધ સહાય અને વિધવા સહાય: સામાજિક સુરક્ષા અંતર્ગત મળતી વિવિધ પેન્શન યોજનાઓના ફોર્મ સ્વીકારી મંજૂરીની પ્રક્રિયા ઝડપી બનાવાઈ હતી.
ગ્રામજનોમાં ભારે ઉત્સાહ
આ કેમ્પને કારણે ટંકારીઆ અને આસપાસના વિસ્તારના લોકોને પોતાના વ્યક્તિગત દસ્તાવેજો અને સરકારી યોજનાઓના લાભ મેળવવામાં ખૂબ જ સરળતા રહી હતી. સમય અને નાણાં બંનેની બચત થતાં સ્થાનિકોએ સરકાર અને વહીવટી તંત્રના આ પ્રશંસનીય પગલાંને બિરદાવ્યું હતું. સ્થાનિક પદાધિકારીઓ અને અધિકારીઓએ સમગ્ર પ્રક્રિયાનું સુચારુ સંચાલન કર્યું હતું.

HAJI MOHMED IBRAHIM MANKI [FATHER OF ISHAQMASTER] passed away…………. Inna Lillahe wainna Ilayhe Rajeun. Namaj e janaja will held at Bhadbhag graveyad 9am tomorrow. May ALLAH [SWT] grant superior place in Jannatul firdaush. Ameen…..

શૈખુલ ઇસ્લામ ટ્રસ્ટ, ટંકારિયા શાખાએ વાર્ષિક મિટિંગમાં “બેસ્ટ પરફોર્મન્સ એવોર્ડ” પ્રાપ્ત કરી ગૌરવ વધાર્યું.

શૈખુલ ઇસ્લામ ટ્રસ્ટની વાર્ષિક મિટિંગનું આયોજન અહમદાબાદ ખાતે ગતરોજ કરવામાં આવ્યું હતું. આ મિટિંગ દરમિયાન ટ્રસ્ટની વિવિધ શાખાઓ દ્વારા કરવામાં આવેલી સેવાકીય, સામાજિક અને સંસ્થાકીય કામગીરીની સમીક્ષા કરવામાં આવી હતી.

આ પ્રસંગે શૈખુલ ઇસ્લામ ટ્રસ્ટની ટંકારિયા શાખાને વર્ષ દરમિયાન ઉત્કૃષ્ટ કામગીરી બદલ “બેસ્ટ પરફોર્મન્સ એવોર્ડ”થી સન્માનિત કરવામાં આવી હતી. ટંકારિયા શાખાના હોદ્દેદારો અને કાર્યકર્તાઓની મહેનત, સેવાભાવ અને સમર્પણની પ્રશંસા કરવામાં આવી હતી.

આ સન્માનથી ટંકારિયા શાખાના કાર્યકર્તાઓમાં આનંદ અને ઉત્સાહની લાગણી જોવા મળી હતી. ટ્રસ્ટના આગેવાનો દ્વારા ટંકારિયા શાખાને અભિનંદન પાઠવી ભવિષ્યમાં પણ વધુ ઉત્સાહ અને સેવાભાવ સાથે સમાજહિતના કાર્યો કરવા માટે પ્રોત્સાહિત કરવામાં આવી હતી.

ટંકારિયા શાખા માટે આ એવોર્ડ માત્ર સન્માન નહીં પરંતુ ભવિષ્યમાં વધુ સારી કામગીરી કરવા માટે પ્રેરણારૂપ બન્યો છે.

આજે દારુલ ઉલુમ અશરફીય્યહ કમિટી દ્વારા હઝરત **ગૌષે આઝમ, મહબૂબે સુબહાનિ , શેખ અબ્દુલ કાદિર જીલાની (રદી.)**ની પવિત્ર સ્મૃતિ નિમિત્તે ગ્યારવી શરીફની સામૂહિક ન્યાઝનું ભવ્ય આયોજન કરવામાં આવ્યું હતું.
આ પ્રસંગે મોટી સંખ્યામાં ગ્રામજનો, અકીદતમંદો, કમિટીના સભ્યો તથા સમાજના આગેવાનો ઉપસ્થિત રહ્યા હતા. ગતરોજ બાદ નમાજે ઈશા દારુલ ઉલુમ હોલમાં કુરઆન શરીફની તિલાવત, નાત-એ-પાક, વાઅઝ-નસીહત તથા હઝરત ગૌશે આઝમ (રદી.)ની પવિત્ર જીવનગાથા અને દીની સેવાઓ અંગે પ્રકાશ પાડવામાં આવ્યો હતો. ઉપસ્થિત હજરતોએ હઝરત ગૌશે આઝમ (રદી.)ની શિક્ષાઓને પોતાના જીવનમાં ઉતારવા, સદાચાર, ભાઈચારો, માનવ સેવા અને દીન પ્રત્યેની વફાદારી જાળવવાનો સંદેશ આપ્યો હતો. આજે ગ્યારવી શરીફની સામૂહિક ન્યાઝ કરવામાં આવી હતી. ન્યાઝમાં મોટી સંખ્યામાં અકીદતમંદોએ ભાગ લીધો હતો. અને સામુહિક ન્યાઝનો લુત્ફ ઉઠાવી તૃપ્ત થયા હતા.
દારુલ ઉલુમ અશરફીય્યહ કમિટી દ્વારા આયોજિત આ પવિત્ર કાર્યક્રમ શ્રદ્ધા, અને ભાઈચારાના માહોલમાં સંપન્ન થયો હતો. ટંકારીઆની નવયુવાન કમિટી કે જે ૧૦૮ તારીખે ઓળખાય છે, તેમને ખડે પગે રહી આ કાર્યક્રમને સફળ બનાવ્યો હતો.

ટંકારીઆ એજ્યુકેશન એન્ડ વેલફેર સોસાયટી (માઈનૉરિટી ટ્રસ્ટ) સંચાલિત ધ ટંકારીઆ હાઈસ્કૂલ ખાતે યુ.કે.ના માનનીય એમ.પી. શ્રી ઇકબાલહુસેન મહંમદનું ભવ્ય અને ઉષ્માભેર સ્વાગત કરવામાં આવ્યું હતું.

આ પ્રસંગે શાળા પરિવાર, ટ્રસ્ટના હોદ્દેદારો, શિક્ષકો તથા સ્થાનિક આગેવાનો દ્વારા માનનીય મહેમાનનું આત્મીય સ્વાગત કરવામાં આવ્યું હતું. શાળાની શૈક્ષણિક પ્રવૃત્તિઓ, વિકાસકાર્યો તેમજ વિદ્યાર્થીઓના ઉજ્જવળ ભવિષ્ય માટે કરવામાં આવતી વિવિધ કામગીરી અંગે પણ ચર્ચા કરવામાં આવી હતી.

ટંકારીઆ હાઈસ્કૂલ સાથે જોડાયેલા શિક્ષણપ્રેમીઓ અને સમાજના આગેવાનોએ યુ.કે.માં જાહેર જીવનમાં સેવા આપી રહેલા માનનીય એમ.પી. શ્રી ઇકબાલહુસેન મહંમદની મુલાકાતને ગૌરવપૂર્ણ પ્રસંગ ગણાવી હતી.

આ સમગ્ર કાર્યક્રમ દરમિયાન સૌમાં ઉત્સાહ અને આનંદનો માહોલ જોવા મળ્યો હતો. શાળા પરિવાર દ્વારા માનનીય મહેમાનને હાર્દિક શુભેચ્છાઓ પાઠવી તેમના આગમન બદલ આભાર વ્યક્ત કરવામાં આવ્યો હતો.

વિદ્યાર્થીઓની પ્રતિભાથી ખીલી ઊઠ્યું ટંકારીઆ બ્રાંચ કુમારશાળા પરિસર

ટંકારીઆની બ્રાંચ કુમારશાળામાં બુધવાર, તા. ૩૦ સપ્ટેમ્બર, ૨૦૨૬ના રોજ સી.આર.સી. કક્ષાના ગણિત-વિજ્ઞાન મેળાનું ભવ્ય આયોજન કરવામાં આવ્યું હતું. આ પ્રસંગે યુકેથી પધારેલા ડ્યૂઝબરી એન્ડ બાટલીના મેમ્બર ઓફ પાર્લામેન્ટ (MP) જનાબ ઈકબાલ હુસૈન મહંમદનો સન્માન સમારંભ પણ યોજાયો હતો. અતિથિ વિશેષ તરીકે ઉપસ્થિત ઈકબાલભાઈનું સન્માન પુષ્પગુચ્છ, સન્માનપત્ર તથા શાલ અર્પણ કરી કરવામાં આવ્યું હતું. આ ઉપરાંત અઝીઝ ટંકારવી સાહેબ અને નાસીરભાઇ લોટીયાને પણ શાલ અર્પણ કરી સન્માન કરવામાં આવ્યું હતું.

ગણિત – વિજ્ઞાન મેળાનું ઉદ્ઘાટન માનનીય MP ઈકબાલ હુસૈન મહંમદના હસ્તે રિબીન કાપીને કરવામાં આવ્યું હતું. મેળામાં વિવિધ શાળાઓના વિદ્યાર્થીઓએ વિજ્ઞાન અને ગણિત આધારિત અવનવી કૃતિઓ તથા મોડેલ્સ રજૂ કર્યા હતા. પર્યાવરણ સંરક્ષણ, જળ સંરક્ષણ, ઊર્જા બચત, નવીનીકરણીય ઊર્જા, સ્વચ્છતા, આરોગ્ય, ટેકનોલોજી સહિતના વિવિધ વિષયો પર વિદ્યાર્થીઓએ સર્જનાત્મક પ્રયોગો રજૂ કરી પોતાની પ્રતિભાનો પરિચય કરાવ્યો હતો.આ પ્રસંગે મુખ્ય મહેમાન જનાબ ઈકબાલ હુસૈન મહંમદ, શાળાના આચાર્ય મુનાફસાહેબ, અઝીઝ ટંકારવી સાહેબ, સફવાનભાઇ ભુતા, સઈદ સાહેબ બાપુજી તથા નાસીરભાઈ લોટીયાએ પ્રસંગોચિત ઉદ્દબોધન કરી વિદ્યાર્થીઓને વૈજ્ઞાનિક અભિગમ, જિજ્ઞાસા અને સર્જનાત્મક વિચારસરણી વિકસાવવા પ્રેરણાદાયી માર્ગદર્શન આપ્યું હતું. મુખ્ય મેહમાન ઇકબાલભાઈએ વિદ્યાર્થીઓની વિવિધ કૃતિઓ અને ઉત્સાહની પ્રશંસા કરી તેમને ભવિષ્યમાં શિક્ષણ તથા વિજ્ઞાનના ક્ષેત્રે નવી ઊંચાઈઓ હાંસલ કરવા પ્રોત્સાહિત કર્યા હતા.

વિદ્યાર્થીઓએ પોતાની કૃતિઓ અંગે મહેમાનો તથા મુલાકાતીઓને આત્મવિશ્વાસપૂર્વક માહિતી આપી હતી. નિર્ણાયકશ્રીઓ દ્વારા મોડેલની રચના, રજૂઆત, વૈજ્ઞાનિક અભિગમ, વિષયની સમજણ અને સર્જનાત્મકતાના આધારે કૃતિઓનું મૂલ્યાંકન કરવામાં આવ્યું હતું.

સમગ્ર મેળા દરમિયાન વિદ્યાર્થીઓમાં ભારે ઉત્સાહ અને જિજ્ઞાસા જોવા મળી હતી. શિક્ષકોએ વિદ્યાર્થીઓને સતત માર્ગદર્શન આપી તેમની કૃતિઓને વધુ અસરકારક અને જ્ઞાનપ્રદ બનાવવામાં મહત્વપૂર્ણ ભૂમિકા ભજવી હતી.

અંતે શ્રેષ્ઠ કૃતિ રજૂ કરનાર વિદ્યાર્થીઓને પ્રોત્સાહિત કરવામાં આવ્યા હતા. સાથે જ ગણિત – વિજ્ઞાન મેળાને સફળ બનાવવા બદલ તમામ સહભાગી વિદ્યાર્થીઓ, શિક્ષકો, નિર્ણાયકશ્રીઓ તથા આયોજનમાં સહયોગ આપનાર સૌનો આભાર વ્યક્ત કરવામાં આવ્યો હતો.

આ ગણિત-વિજ્ઞાન મેળાએ વિદ્યાર્થીઓમાં “જાણીએ, વિચારીએ, પ્રયોગ કરીએ અને નવું સર્જીએ” જેવી વૈજ્ઞાનિક દૃષ્ટિ અને સર્જનાત્મક વિચારસરણી વિકસાવવામાં મહત્વપૂર્ણ યોગદાન આપ્યું હતું. વિજ્ઞાનના પ્રયોગો અને વિદ્યાર્થીઓની અવનવી કૃતિઓએ ઉપસ્થિત મહેમાનો તથા વાલીઓનું પણ ધ્યાન આકર્ષ્યું હતું.

કાર્યક્રમમાં જનાબ અઝીઝભાઈ ટંકારવી સાહેબ, જિલ્લા પંચાયત સદસ્ય, તાલુકા પંચાયત સદસ્ય, ટંકારીઆ ગામના સરપંચશ્રી મંગાભાઈ, ઉપસરપંચ શ્રી સફવાનભાઈ, મુસ્તુફાભાઈ ખોડા, સઈદ સાહેબ બાપુજી, સામાજિક અગ્રણી નાસીર સાહેબ લોટીયા, મુસ્તાકભાઈ દોલા, અજીજભાઈ ભા, ટંકારીઆ બીટના પ્રવીણભાઈ સોલંકી, ગૃપ આચાર્યશ્રી શબ્બીરભાઈ, તલાટી-કમ-મંત્રી ઘનશ્યામભાઈ તેમજ એસ.એમ.સી.ના સભ્યો સહિતના મહાનુભાવો, શાળાઓના આચાર્યો, શિક્ષકો ઉપસ્થિત રહ્યા હતા. સમગ્ર કાર્યક્રમનું સુંદર સંચાલન શાહેદાબેન કારીએ કર્યું હતું

ડ્યૂઝબરી એન્ડ બાટલીના મેમ્બર ઓફ પાર્લામેન્ટ (MP) જનાબ ઈકબાલ હુસૈન મહંમદનો પરિચય અને સન્માન
 ☝️ Instagram ક્લિપ માટે ઉપરની લિંક પર ક્લિક કરો.

સાત સમુંદર પાર ગામનું નામ રોશન કરનાર સાંસદના બહુમાન બદલ ટંકારીઆ ગામે ગૌરવની લાગણી અનુભવી; સામાજિક અગ્રણી અબ્દુલ્લાહ કામઠી સહિત પ્રતિષ્ઠિત નાગરિકો રહ્યા હાજર…

વિદેશની ધરતી પર રાજકીય ક્ષેત્રે ઝળહળતી સિદ્ધિ હાસિલ કરી આંતરરાષ્ટ્રીય સ્તરે ગામનું નામ રોશન કરનાર યુનાઇટેડ કિંગડમ (UK)ના સાંસદ (MP) ઈક્બાલહુસૈનનું વતનમાં આગમન થતાં સમગ્ર ગ્રામજનો દ્વારા તેમનું ભવ્ય બહુમાન કરવામાં આવ્યું હતું. આજરોજ ટંકારીઆ ગામે આવેલા તેમના નિવાસ્થાને સમસ્ત ટંકારીઆ ગામ વતી એક વિશેષ અને ભવ્ય સન્માન સમારંભનું આયોજન કરવામાં આવ્યું હતું.

આ ગૌરવશાળી પ્રસંગે ભરૂચ જિલ્લાના જાણીતા સામાજિક કાર્યકર અબ્દુલ્લાહ કામઠી ઉપરાંત ટંકારીઆ ગામના અનેક પ્રતિષ્ઠિત નાગરિકો, વડીલો અને સામાજિક અગ્રણીઓએ મોટી સંખ્યામાં હાજરી આપી હતી. પોતાના ગામના જ વતનીએ વિદેશમાં મેળવેલી આ અભૂતપૂર્વ સફળતાને વધાવવા માટે સમગ્ર ટંકારીઆ પંથકમાં ભારે હર્ષોલ્લાસ અને ઉત્સાહનો માહોલ જોવા મળ્યો હતો.

કાર્યક્રમ દરમિયાન ભરૂચથી પધારેલા ઉપસ્થિત મહાનુભાવો અને ગ્રામજનો દ્વારા એમ.પી. ઈક્બાલહુસૈનને પરંપરાગત શાલ ઓઢાડીને તેમજ સન્માનપત્ર એનાયત કરીને ભાવભીનું બહુમાન કરવામાં આવ્યું હતું. એક સન્માનપત્ર તેમને સમસ્ત ભરૂચ જિલ્લાના લોકો તરફથી અને બીજું સન્માનપત્ર સમસ્ત ટંકારીઆના ગ્રામજનો તરફથી અર્પણ કરાયું હતું. 

આ પ્રસંગે ગામના પ્રતિષ્ઠિત આગેવાનોએ ગૌરવભેર જણાવ્યું હતું કે, ઈક્બાલહુસૈને મેળવેલું આ પદ સમગ્ર ટંકારીઆ ગામ અને ભરૂચ જિલ્લા માટે અત્યંત ગૌરવ અને નવી પેઢી માટે પ્રેરણા સમાન છે. જ્યારે યુ.કે.ના એમ.પી. ઈક્બાલહુસૈને પણ પોતાના વતન તરફથી મળેલા આ અપાર સ્નેહ, સત્કાર અને સન્માન બદલ ટંકારીઆ ગામના તમામ લોકોનો હૃદયપૂર્વક આભાર માન્યો હતો અને વતન પ્રત્યેની પોતાની લાગણી વ્યક્ત કરી હતી.

HAJIYANI ZOHRABEN YUNUS ROBAD [MOTHER OF IRFAN ROBAD] passed away………….. Inna Lillahe wainna ilayhe rajeun. May ALLAH [SWT] grant superior place in Jannatul Firdaush.