ટંકારીયા ગામના યુવકનું કેનાલમાં ડૂબી જવાથી કરુણ મોત

ટંકારીયા ગામના ૨૨ વર્ષીય યુવકનું કરુણ મોત નીપજતાં સમગ્ર પંથકમાં અરેરાટી વ્યાપી જવા પામી હતી.

પ્રાપ્ત પોલીસ સૂત્રોના જણાવ્યા અનુસાર, ટંકારીયા ગામના રહેવાસી દશરથ શંકર વસાવા (ઉંમર વર્ષ ૨૨) કપડું ધોવા માટે નર્મદા નિગમની કેનાલમાં ગયા હતા. આ દરમિયાન અચાનક તેમનો પગ લપસી જતાં તેઓ કેનાલના ઊંડા પાણીમાં ગરકાવ થઈ ગયા હતા. દુર્ભાગ્યવશ, પાણીમાં ડૂબી જવાથી તેમનું મોત નીપજ્યું હતું.

ઘટનાની જાણ થતાં પાલેજ પોલીસ તાત્કાલિક ઘટનાસ્થળે પહોંચી હતી. પોલીસે મૃતદેહને કેનાલના પાણીમાંથી બહાર કાઢી કાયદેસરની કાર્યવાહી હાથ ધરી હતી. ત્યારબાદ મૃતદેહને પોસ્ટમોર્ટમ અર્થે પાલેજ સામુહિક આરોગ્ય કેન્દ્ર ખાતે ખસેડવામાં આવ્યો હતો.

યુવાનના અચાનક અવસાનના સમાચારથી તેમના પરિવારજનો પર દુઃખનો પહાડ તૂટી પડ્યો હતો. પરિવારજનોમાં ઘેરા શોકની લાગણી પ્રસરી જવા પામી હતી, જ્યારે ગામમાં પણ શોકનો માહોલ છવાઈ ગયો હતો.

અકાળે યુવાન પુત્ર ગુમાવતાં પરિવાર પર આભ તૂટી પડ્યું છે અને સમગ્ર ગામમાં આ કરુણ ઘટનાને પગલે હૃદયદ્રાવક વાતાવરણ સર્જાયું છે.